نصائح للشباب.........

نصائح عامه لكل رجل عربي خليجي
و للسعوديين خاااصة

في الشباب و في السن الجامعي غالبا:
1) إذا كنت بعيد عن أهلك. يعني تدرس, أو تشتغل في مدينه و أهلك في مدينه ثانيه كل يوم الصباح وأنت في السيارة رايح لشغلك أتصل على أمك. لااااازم تتصل على أمك يوميا, لأن الأمهات رقيقات, و خوفات, و يدورون للقلق فلازم تطمن قلبها كل يوم.
2) أعدل في الأهتمام بين أمك و بوك. لأن الفرق في المراعاة بينهم يولد الغيرة. كل ما كبر الأنسان كل ما رجعت فيه تصرفات الأطفال.
3) لا تسرف في الأنفاق, و لا تكون عزيز نفس عند خواتك. ألي تبيه أطلبه تراهم يحنون عليك لأنك عزابي.
4) لا تسوي فيها رجال عند خواتك. تغطو. ألبسوا قفازات. لا تطلعون. لا تفعلون. لأنهم بيحتقرونك. هم مصرفين أمورهم طول السنه, و يوم تجي يومين في السنه تسوي فيها.


أهم شيء تفكر فيه عند الخطبة و قبل الزواج:
1) لا تأخذ الجميلة الرفلاء و هذا خطأ يطيح فيه الكثير من الشباب. الجمال يومين, أو ثلاث شهور بالكثير و تمل منه, لكن الرفالة في كبدك لين تموت, أو تطلقها. و البلا لا كان عندك منها ولد و إلا بنت.
2) تنقى خوال عيالك. "الولد على خالة و البنت على عمتها". يعني أعرف أن عيالك رجال إذا خوالهم رجال, و الله يستر أش يطلعون إذا كانوا خوالهم شيء ثاني.
3) أستخير ستين مليون ترليون مرة قبل ما تخطب حتى.


بعد الزواج:
1) إذا ربي رزقك بزوجه تهتم لأهلك فالحمد لله, لكن إذا كانت تحاول لو مجرد محاولة تبعدك عنهم أبدا لا تعطيها وجه. لأن أبتعادك عن هلك لعيونها يخليها تحتقرك, و تشوفك طوع أمرها في كل ألي تبيه.
2) إذا كانت زوجتك رفلا في العمل المنزلي. يعني ما ترتب البيت بأستمرار أو إذا رتبت ما يكون ترتيبها ذاك الزود فحاول أنك ترشدها, و تساعدها في الترتيب, و أهم شيء رب بناتك على الأهتمام في البيت لأن الأم الرفلا ما تجيب إلا بنات رفل. إذا ما ربيتهم على الأهتمام وهم صغار مارح يهتموا لا كبروا.
3) إذا زارك أحد في البيت خلك بشوش, و أبتسامتك من الأذن للأذن حتى لو كان ألد أعداءك.
4) أسرار أمك و بوك و خواتك أبدا لا تعطيها زوجتك. سواء مشكلة. سوء فهم. أي شيء مهما كبر أو صغر لأنها بتروح تقدمها وجبه دسمه لأهلها, و من أهلها لبقية أفراد المجتمع.
5) أبدا أبدا أبدا. لا تأمر أختك مهما صغر سنها عشان زوجتك. هذا يخليك الخكيري الأهبل في عيون الجميع. من أختك لأكبر أخوانك مرورا بأمك و بوك أنتهاء بزوجتك, و كل من بيدري عن هالتصرف فيما بعد.
6) أبدا لا تحتقر زوجتك, و لا تقلل ن أهميتها في حياتك لأنها بتكرهك, و دور للأستقرار بعدها.
7) إذا جاك عيال أمنعني من الأسماء ألي على نفس الوزن و القافيه تقول قصيدة, و أمنعني من الأسماء البشعة ألي أنتهى زمانها بحجة أنه أسم أمك أو بوك. و الله ما سووا شيء زين في حياتهم إلى أنهم جابوك. لا فتحوا القدس, و لا حلوا مشكلة دافور عشان تسمي عليهم وش ما كان الثمن. ألي هو في الحقيقة كرة ولدك لنفسة و لكل من ينادية بهالأسم ليــــــــــــــــــــــــــن يموت, أو تصير معجزة و توافقون يغير الأسم.



آخر شيء و أهم شيء في جميع مراحل حياتك..
إذا كان أبوك ميت و كانوا العيال كثير. لا تشتتونهم بينكم. كل واحد يتحكم من جهه.
أتفقوا فيما بينكم, و حكموا أعقلكم, و أهداكم, و أكثركم مرونه في التعامل ليكون الأب الجديد. أما الباقي يشيلون أيديهم من التربية و يصيررون أخوان بس.
تشتتهم بينكم, و كون كل واحد يقول كلام يحسسهم بالذل و المهانة.
حكم عليهم بالذل الأبدي في اليوم ألي مات فيه أبوهم.
رجاء أخوي! لا تزيد الطين بلة, و لا تزيد القلب علة.
<<<ترى كثير عيال مورين خواتهم الويل بعد موت أبوهم بحجة الخوف عليهم. ترى المملكه ما يحكمها ثنين.


أتمنى أكون أفدتكم بهالنصائح البسيطة المستمدة من واقع الحياة..